A A A

Харьяа дүүрэг, улсын тэмцээнүүдэд жил бүр манлайлан оролцож, тасралтгүй амжилт үзүүлэн ирсэн төдийгүй ХБНГУ-д жил бүр зохиогдож ирсэн олон улсын хүүхдэд залуучуудын сагсан бөмбөгийн „Eastercup Berlin Moabit - FIBA Europe tournament“ –д хоёр дахь жилдээ амжилттай оролцож буй Хан-Уул дүүргийн 60-р сургуулийн Сараа багштай сагсан бөмбөгийн охидын багт халуун баяр хүргэхийн ялдамд Монгол хүнийг эрүүл саруул байлгах, эв нэгдлийг бэхжүүлэх, иргэдийн бие бялдрын хүмүүжлийг төгөлдөржүүлэх, багийн спортыг хөгжүүлэх, улмаар алдарт тамирчдын залуу халааг бэлтгэх нэн чухал үйлсэд санаачлага, идэвх сэтгэл гарган зүтгэж буй та бүхний үйл ажиллагааг өндрөөр үнэлэн дэмжиж ХБНГУ-ын Берлин хотод ажиллаж үйл ажиллагаа явуулж буй ТББ-уудаас Уугуул нутгийнхаа хөгжил цэцэглэлт, ирээдүйн сайн сайхны төлөө чиглэсэн сайн үйлсийн аяны хүрээнд танай Хан-Уул дүүргийн 60-р сургуулийн сагсан бөмбөгийн хичээлийг дэмжин бидний хамтын сангаас 1500 евроны спортын техник хэрэгслээр дэмжихээр санал нэгтэй шийдвэрлэсэнийг үүгээр уламжлан холбоодын төлөөллөөс гардуулав.

Мөн 60 - р сургуулийн охидын баг болон энэ жил анх удаа оролцож байгаа 52 - р сургуулийн охидын багт дурсгалын бэлэг гардуулав.

Эрүүл биед саруул ухаан оршино.

2018 оны 3 дүгээр сарын 31 -ний өдөр Берлин хот

БЕРЛИН ХОТЫН СПОРТЫН “ЦОГ” КЛУБ, 

МАЙДАР ХОЛБОО ТББ, 

МОНБЕР ТЕАМ, 

МОНГОЛ ГЕРМАНЫ ЭДИЙН ЗАСГИЙН КЛУБ ТББ,

Монголын шагайн харвааны ХБНГУ дахь Хийморь салбар холбооны зохион байгуулсан „Монгол шагайн харвааны Германы цом“-ын төлөөх анхдугаар тэмцээн Соонэнматтэ амралтын газар амжилттай болж өнгөрлөө.

ЮНЕСКО-гийн соёлын биет бус өвийн хүн төрөлхтний төлөөллийн жагсаалтад бүртгэгдсэн Монгол шагайн харвааны тус тэмцээнд Герман, Франц, Бельги, Чех, Швецари, Швед, Англи, Польш орнуудаас 17 баг, 110 гарам шагайчид цуглан цэц мэргэнээ сорин өрсөлдсөний дунд Монгол улсын үлэмж дархан мэргэн Ю.Мөнхтөр, Дархан мэргэн Б.Баатарбат, Гарамгай мэргэн М.Энхболд, Монгол улсын хошой мэргэн Б.Батхуяг, Г. Хишигсүрэн, н.Эрдэнэбат, Монгол улсын мэргэн Г.Чүлтэмбаяр болон аймгийн цолтой 5 мэргэн оролцсон нь тус тэмцээний чансааг өндөрсгөн харуулж байлаа.

Хоёр өдрийн турш өрсөлдөөнтэй явагдаж дууссан тус тэмцээнд Б.Жаргалсайхан ахлагчтай Чехын баг түрүүлэн Цом, алтан медаль, мөнгөн шагнал, МУ-ын аймгийн гоц мэргэн С.Эндгэрэл ахлагчтай Шведын баг удаалж мөнгөн медаль, мөнгөн шагнал, Ч.Мөнх-Отгон ахлагчтай Бельгийн баг гурвалж хүрэл медаль, мөнгөн шагнал тус тус хүртлээ.

Мөн цуваа харваан төрөлд МУ-ын хошой мэргэн Г.Хишигсүрэн 20 сумнаас 19 онож түрүүлэн МУ-ын Харьшгүй мэргэн Д.Болдбаатарын нэрэмжит цом, алтан медаль, мөнгөн шагнал, МУ-ын аймгийн гоц мэргэн Д.Болдхуяг 18 онож мөнгөн медаль, мөнгөн шагнал, МУ-ын мэргэн Ё.Чүлтэмбаяр 17 онож хүрэл медаль, мөнгөн шагналын эзэд боллоо. Монгол шагайн харваан дүрмийн дагуу 60 аас дээш насны ахмад харваачдын дунд хавчаахай буутай харваачдын дунд явуулсан тэмцээнд Чех улсаас ирсэн Б.Жаргалсайхан түрүүллээ.

Тэмцээнийг нээж язгуур урлагаар эх орноо гадаадад амжилттай сурталчилж буй Сэда хамтлаг урлагийн тоглолт хийлээ. Хийморь холбооны зохион байгуулсан „Монгол шагайн харвааны Германы цом“-ын төлөөх анхдугаар тэмцээнийг Монгол улсаас ХБНГУ-д суугаа ЭСЯ, Герман дахь Монгол академчидын холбоо, Mongolei Shop - Монгол дэлгүүр, Бонн хот дахь Монгол төв, ХБНГУ дахь ТББ- ын зөвлөл, Монголын найзууд ТББ, Мюнхен хотын " Од" сургууль, Ж.Мөнхжаргал, Б.Энхтүвшин, Д.Цогбадрах болон бусад хувь хүмүүс ивээн тэтгэж оролцжээ.

Европын шагайн түүхэнд анх удаа ийм олон баг нэгдэж, эвтэй найртай, ёс жудагтай, улсын, аймгийн цол хэргэмтэй олон харваачид хүрэлцэн ирж чансаа өндөр тэмцээн болж өнгөрсөнөөс дүгнэхэд шагайн спорт Европт хир тархацтай хөгжиж байгаа нь харагдаж байна.

Шагайн харваа нь XIII зууны үед үүссэн бөгөөд 2001 онд үндэсний их баяр наадмын нэгэн төрөл болж, албан ёсны дүрэмтэй болсон. Бөх барилдвал бяртай, морь унавал эрэмгий, сур шагай харвахдаа мэргэн болно гэж эртнээс Монголчууд хүндэтгэсээр ирсэн ба шагайн харваа нь ухаан төвлөрүүлэхээс гадна баг хамт олноо хүндэтгэх, нөхөрлөлийг батжуулдаг давуу талтай билээ.

Та бүхний хараа хурц, оноо мэргэн, уухай цээл байх болтугай.

Монголын шагайн харвааны ХБНГУ дахь Хийморь салбар холбоо

Зургийн цомог үзэх

Европ дахь Монголчуудын дунд уламжлал болох зохион байгуулагдаж ирсэн сагсан бөмбөгийн аварга шалгаруулах 13 дахь удаагийн тэмцээн энэ жил БНЧУ улсын Праг хотод 2018 оны 11 сарын 02 - 04 өдрүүдэд зохион байгуулагдахаар бэлтгэл ажлууд эхлэн, товоо гаргаад буйг дуулгахад таатай байна. Тус тэмцээнийг "Европ дахь монголчуудын урлаг спортын төв, ТББ", Монгол улсаас БНЧУ - д суугаа Элчин сайдын яамны дэмжлэгтэй зохион байгуулах боллоо.

Тэмцээн Праг хотын эмэгтэй Евролигийн тэмцээн болдог "Краловка" спорт зааланд болно. Тэмцээний зохион байгуулалт, спонсор-санхүүгийн дэмжлэг болон бүхий л төрлийн хамтын ажиллагааны саналыг бид бүхэн баяртайгаар хүлээн авах болно. Тэмцээний тухай тодорхой мэдээллийг дахин мэдээлэх болно.

Европ дахь монголчуудын урлаг спортын төв, ТББ

2018 оны хавар 4 сард Австри улсад Европ, ОХУ, Солонгос, Хятад, Япон, Тайваний Монгол залуучуудын тив, бүсийн аварга багууд өрсөлдөнө. Хилийн чанад дахь Монголчуудын дунд өргөнөөр хөгжиж буй спортын холбоо, баг, нэгдэлүүдийг дэмжиж ажиллах, тэдний хамтын ажиллагааг идэвхжүүлэх, цаашлаад тив улсын дунд олон жил зохиогдож ирсэн аварга шалгаруулах уламжлалт тэмцээний / хөлбөмбөг, сагсан бөмбөг, шагайн харваа, волейбол, ширээний теннис, заалны хөл бөмбөг/ спортийн төрлүүдээр 4 жилд нэг удаа „Хилийн чанад дахь Монголчуудын Спортын наадам“ зохион байгуулах ажлын эхлэл, бэлтгэл суурийг тавих, зохион байгуулалтын өндөр төвшинд хувь нэмрээ оруулахад хэтийн зорилго оршино.

Дэлгэрэнгүй мэдээлэл: https://www.facebook.com/events/2084749985078231/

Та бүхнийг ХБНГУ дахь Монголчуудын дунд зохион явуулдаг Берлин хотын “Цог Монгол спорт клубийн нэрэмжит Эв нэгдэл – Нөхөрлөл V - 2017 тэмцээнийд урьж байна. Тэмцээн 2017 оны 10 сарын 14-15 хооронд Берлин хотод Сагсан бөмбөг, шатар болон гар бөмбөгийн холимог багийн төрлөөр зохиогдоно. 

Тэмцээний заавар: 

Германы Хамбург хотноо өнөөдөр (2017.08.25) эхлэх боксын насанд хүрэгчдийн Дэлхийн аварга шалгаруулах тэмцээний БОКСЧДЫН СУГАЛАА ТОДОРЛОО

Дэлхийн аваргад Монголын боксчид дөрвөн тамирчны бүрэлдэхүүнтэй оролцохоор хилийн дээс алхсан. Тодруулбал, 49 кг-ын жинд ОУХМ Г.Ган-Эрдэнэ, 60 кг-ын жинд Гавьяат тамирчин Д.Отгондалай, 64 кг-д ОУХМ Б.Чинзориг, 69 кг-ын жинд ОУХМ Б.Түвшинбат нар тус тус тулалдана. Тэдний хувьд өнгөрсөн дөрөвдүгээр сард Узбекистанд болсон Азийн аварга шалгаруулах тэмцээнээс эрхээ авсан билээ.